Ціханоўская заклікала канцлера Германіі падтрымаць міжнароднае расследаванне злачынстваў Лукашэнкі
11 лістапада, Позірк. Падтрымаць міжнароднае расследаванне злачынстваў Лукашэнкі, у тым ліку злачынствы супраць чалавечнасці і вываз украінскіх дзяцей у Беларусь, заклікала Святлана Ціханоўская канцлера Германіі Олафа Шольфа.
Сустрэча адбылася 11 лістапада ў Малазе (Іспанія) у кулуарах кангрэса Партыі еўрапейскіх сацыялістаў, паведаміў “Позірку” галоўны дарадца беларускага дэмакратычнага лідара Франак Вячорка.
“Ціханоўская выказала пажаданне, каб рэзалюцыя бундэстага, якая была ўхваленая 8 лістапада, пасля дыскусіі аб еўрапейскай будучыні Беларусі, была як мага хутчэй імплементаваная”, — адзначыў дарадца.
Паводле яго слоў, дэмлідар запрасіла Шольца прыяднацца да Дня салідарнасці з Беларуссю 12 лістапада і падтрымаць палітзняволеных.
8 лістапада ў Берліне Ціханоўская правяла перамовы з дарадцам канцлера па знешняй палітыцы і палітыцы бяспекі Енсам Плётнерам.