Інвестыцыі ў асноўны капітал выраслі на 15% — Белстат
20 лютага, Позірк. Інвестыцыі ў асноўны капітал у Беларусі за студзень 2024 года склалі 2,3 млрд рублёў — на 15% больш, чым у першым месяцы 2023-га (2 млрд), сведчаць даныя Нацыянальнага статыстычнага камітэта.
Чвэрць агульнага агульнага аб’ёму інвестыцый прыпала на прадпрыемствы Мінскай вобласці (летась 26,2%).
Далей ідуць Мінск — 18% (14,5%), Гомельская вобласць — 14,2% (13,4%), Брэсцкая — 13,5% (16,6%), Гродзенская — 10,3% (13,9%), Віцебская — 10% (8,4%) і Магілёўская — 9,1% (6,9%).
У асноўны капітал прыватных кампаній было ўкладзена 54,2% (54,8%), дзяржпрадпрыемстваў – 43,9% (43,2%), замежных — 1,8% (2%).
У тэхналагічнай структуры лідарам стала сфера будаўніча-мантажных работ, на якую прыпала 45,1 працэнта (53,1%). 41,7% (31,9%) укладанняў было звязана з катэгорыяй “Машыны, абсталяванне, транспартныя сродкі”.
Па дадзеных Белстата, за 2023 год у асноўны капітал у Беларусі было ўкладзена 35,7 млрд рублёў — на 28,4% больш, чым за аналагічны перыяд 2022-га (27,8 млрд).
Летась у рэальны сектар эканомікі Беларусі замежныя інвестары ўклалі 7,7 млрд долараў.
Асноўнымі інвестарамі сталі суб’екты гаспадарання Расіі (66,7% усіх інвестыцый) і Кіпра (14,7%).
Паступленне прамых замежных інвестыцый склала 5,8 млрд. долараў (74,8% ад усяго аб’ёму паступленняў).
Згодна з найважнейшымі прагнознымі (дэ-факта планавымі) параметрамі развіцця краіны на 2024 год, інвестыцыі ў асноўны капітал павінны павялічыцца на 3,9% (да 37 млрд).