Прэзідэнт самаабвешчанай Абхазіі заявіў, што не супраць уступлення ў саюзную дзяржаву
21 лютага, Позірк. Абхазія “хоча быць разам з Беларуссю і Расіяй”, заявіў расійскаму інфармагенцтву ТАСС кіраўнік непрызнанай рэспублікі Аслан Бжанія.
Паводле яго слоў,”СД — гэта фармат, пры якім незалежныя дзяржавы дамаўляюцца на ўзаемавыгадных умовах аб стварэнні наддзяржаўных структур”.
Сухумі, падкрэсліў Бжанія, “гатовы да гэтага”, але неабходна”прайсці пэўны этап, павінны быць падрыхтаваныя нарматыўныя акты, і гэтая гісторыя можа заняць прыкладна 5-10 гадоў, сапраўды гэтак жа, як гісторыя, звязаная з прызнаннем незалежнасці Абхазіі Расеяй”.
Ён нагадаў, што, згодна з міждзяржаўнай дамовай з РФ аб саюзніцтве і стратэгічным партнёрстве, Расія “аказвае садзейнічанне” Абхазіі ва “ўдзеле ў інтэграцыйных працэсах, якія ініцыююцца РФ”.
“Гэтая форма найбольш поўна адпавядае нашаму бачанню будучыні, — заявіў Бжанія. — Мы хочам быць актыўнымі ўдзельнікамі гэтага інтэграцыйнага працэсу [СД] пры захаванні нашай незалежнасці”.
Ён лічыць, што саюз Абхазіі, Беларусі і Расіі быў бы выгадным ўсім яго ўдзельнікам.
“Мы хочам быць дзяржавай, якая можа ўдзельнічаць у інтэграцыйных працэсах разам з такімі дзяржавамі, як Расея і Беларусь, і тымі, хто хоча далучыцца да такога саюзу”, — сказаў Бжанія.
Абхазія — самаабвешчаная дзяржава на тэрыторыі Грузіі, не прызнаная міжнароднай супольнасцю. Пасля ўзброенага канфлікту 2008 года, у якім Абхазію актыўна падтрымала Расія, Тбілісі дэ-факта страціў кантроль над гэтай тэрыторыяй.
Юрыдычна Беларусь не прызнала незалежнасць Абхазіі, але 28 верасня 2022 года Аляксандр Лукашэнка пасля працяглага знаходжання ў Сочы і перамоваў з прэзідэнтам РФ Уладзімірам Пуціным наведаў Піцунду і сустрэўся з Бжаніяй. Прэзідэнт Грузіі Саломэ Зурабішвілі і МЗС краіны асудзілі гэты крок, аднак далей за заявы справа не пайшла.
21 лютага 2023 года Лукашэнка прыняў Бжанію ў Мінску. Кіраўнік грузінскай дзяржавы і знешнепалітычнае ведамства зноў раскрытыкавалі беларускія ўлады за падобныя кантакты ў абыход Тбілісі.
Праз тыдзень пасля той сустрэчы стала вядома, што Абхазія плануе пастаўляць у Беларусь віна і іншыя тавары, а наўзамен хоча атрымліваць малочную прадукцыю.