Ціханоўская: Беларуская мова — наш унікальны пароль
21 лютага, Позірк. Захоўваць і аберагаць родную мову, перадаючы яе дзецям, заклікала Святлана Ціханоўская 21 лютага ў відэазвароце з нагоды Міжнароднага дня роднай мовы.
Паводле слоў дэмакратычнага лідара, беларуская мова — гэта “наш унікальны пароль, які ведаем толькі мы з вамі”. “Пакуль жыве наша мова, будзе жыць і наша нацыя”, — падкрэсліла яна.
Ціханоўская прызналася, што яшчэ тры гады таму “сама не вельмі пачувалася, калі размаўляла на беларускай мове”: “Баялася зрабіць памылку, саромелася нешта сказаць не так. Увесь гэты час мяне падтрымлівалі беларусы, якія таксама пачыналі выкарыстоўваць беларускую мову ў паўсядзённым жыцці”.
Як адзначыла палітык, жаданне вучыць беларускую мову з’явілася ў яе дачкі Агніі: “Ёй вельмі падабаюцца рыфмаванкі Юрыя Несцярэнкі з кніжкі “Неверагодны свет”, вершыкі Андрэя Скурко, а таксама гісторыі з “Ашуканак” Яны Вольскай. Агнія вувучае новыя словы, спрабуе размаўляць па-беларуску і нават чытае пакрысе. Гэта менавіта тое, з чаго пачынаецца беларускасць — калі ты пераходзіш на родную мову ў побыце, у стасунках з блізкімі ці на працоўных сустрэчах”.
На думку Ціханоўскай, беларуская мова — “наш код, які дазваляе нам пазнаць адзін аднаго ў натоўпе”.
Міжнародны дзень роднай мовы быў заснаваны рашэннем 30-й сесіі Генеральнай канферэнцыі ЮНЕСКА ў лістападзе 1999 года і адзначаецца 21 лютага з 2000 года дзеля абароны моўнай і культурнай разнастайнасці.