З памерлым у калоніі палітвязнем Ігарам Леднікам развітаюцца ў Барысаве 22 лютага
21 лютага, Позірк. Развітанне з палітвязнем Ігарам Леднікам, які памёр 20 лютага, адбудзецца 22 лютага ў Барысаве (Мінская вобласць), паведамляе Беларуская сацыял-дэмакратычная партыя (Грамада).
Развітанне пройдзе з 8 да 12 гадзін па адрасе: Барысаў, вул. Нармандыя-Нёман, 22. Адпяванне пачнецца а 9-й гадзіне.
Журналіст і грамадскі актывіст быў затрыманы 12 красавіка 2022 года. Спачатку яго арыштавалі на 15 сутак паводле абвінавачвання, пасля чаго на волю ён не выйшаў.
6 верасня 2022 года суд Ленінскага раёна Мінска (суддзя Таццяна Шоцік) прыгаварыў мужчыну да трох гадоў пазбаўлення волі паводле арт. 367 (паклёп у дачыненні да прэзідэнта) у калоніі ва ўмовах агульнага рэжыму за публікацыю ў партыйным часопісе БСДП “Пазіцыя”.
Леднік памёр у Мінскай раённай бальніцы, куды быў планава дастаўлены з бабруйскай калоніі № 2. Да гэтага ён адбываў пакаранне ў магілёўскай калоніі № 15.
Ён быў інвалідам другой групы, меў праблемы з сэрцам. У чэрвені 2022 года яго адвакат паведаміла, што стан здароўя палітвязня пагоршыўся, ён знаходзіўся ў санчастцы следчага ізалятара ў ляжачым становішчы. У ліпені стала вядома, што актывісту правялі аперацыю на страўнікава-кішачным тракце.
18 ліпеня 2022-га суд Барысаўскага раёна прызнаў інфармацыйную прадукцыю старонкі Ледніка ў “Фэйсбуку” “экстрэмісцкімі матэрыяламі”.
У Беларусі ў зняволенні памерла мінімум пяць палітвязняў. У студзені 2024 года памёр 50-гадовы Вадзім Храсько ў папраўчай калоніі № 3 (пасёлак Віцьба Віцебскага раёна), 21 траўня 2022 года ў шклоўскай калоніі № 17 (Магілёўская вобласць) загадкава памёр 50-гадовы актывіст і грамадскі дзеяч Вітольд Ашурак, 7 траўня 2023-га ў згаданай віцебскай калоніі — 61-гадовы блогер і актывіст з хворым сэрцам Мікалай Клімовіч, 11 ліпеня 2023-га — прывезены ў лякарню з гарадзенскай турмы № 1 57-гадовы мастак Алесь Пушкін, у якога дыягнаставалі прабодную язву страўніка.