21 лютага, Позірк. “Для мяне асабіста родная мова — гэта сіла, якая ўздымае мой народ. Яна дазваляе мне выказваць мае думкі і пачуцці самым натуральным для мяне спосабам”, — адзначыла ў звароце да ўдзельнікаў агульнанацыянальнай анлайн-дыктоўкі, прысвечанай Міжнароднаму дню роднай мовы, 21 лютага прадстаўніца па нацыянальным адраджэнні Аб’яднанага пераходнага кабінета (АПК) Аліна Коўшык.
“Яна вяртае мяне да маіх каранёў, да тых, хто былі першымі творцамі нашай мовы і культуры. Гэта бясконцая падзарадка нашых беларускіх батарэек, што рухаюць нас наперад і не даюць здавацца”, — дадала палітык.
Дзень роднай мовы — гэта, на думку Коўшык, “не проста свята, гэта момант самаасвяшчэння, падзякі за тое, што мова жыве ў нашых сэрцах і ў нашай культуры”.
“Гэта момант, каб падзяліцца сваімі думкамі, пачуццямі, надзеямі з іншымі людзьмі, якія падзяляюць нашы каштоўнасці і прынцыпы. Сёння кожны з нас робіць унёсак у вялікую справу захавання і развіцця нашай роднай мовы. Мы — жывое сведчанне таго, што наша мова развіваецца і здольная аб’ядноўваць розныя пакаленні і розныя часткі грамадства”, — дадала яна.
Коўшык адзначыла, што праз мову “мы адчуваем злучэнне з нашымі сябрамі, з сям’ёй і нацыяй”.
Удзел у дыктоўцы, паводле яе слоў, “гэта значна больш, чым проста праверка пісьменнасці і яе сэнс не ў колькасці памылак”: “Гэта — дэманстрацыя нашай павагі да мовы продкаў, нашай сувязі з мінулым і адказнасці за яго захаванне для будучых пакаленняў. Гэта — унікальная магчымасць адчуць адзінства, бо ў момант напісання дыктоўкі мы становімся часткай вялікай разнастайнай супольнасці, аб’яднанай адной мэтай і любоўю да роднай мовы”.
Як адзначыла Коўшык, у гэтым годзе тэкст дыктоўкі быў абраны невыпадкова, і “гэтай падзеяй мы пачынаем святкаваць сто гадоў са дня нараджэння выбітнага беларускага пісьменніка, сумлення нацыі Васіля Быкава”.
“За свае погляды і прынцыповую пазіцыю ён падвяргаўся рэпрэсіям і ціску з боку ўладаў, ён быў вымушаны эміграваць у канцы 90-х гадоў, правёўшы апошнія гады жыцця ў Чэхіі і Нямеччыне”, —адзначыла палітык.
“Дагэтуль, на жаль яго часта прадстаўляюць як савецкага пісьменніка, але мы з вамі ведаем, што Быкаў выступаў за захаванне і развіццё беларускай мовы, культуры і нацыянальнай свядомасці. Яго голас у абарону нацыянальных інтарэсаў і дэмакратычных каштоўнасцяў зрабіў яго сімвалам нязломнасці і патрыятызму для многіх беларусаў”, — дадала яна.
Прадстаўніца АПК прапанавала ўдзельнікам дыктоўкі напісаць фрагмент з апошняй, аўтабіяграфічнай кнігі класіка “Доўгая дарога дадому”.
Тэкст дыктаваў намеснік кіраўніка АПК, кіраўнік Народнага антыкрызіснага ўпраўлення Павел Латушка.
Міжнародны дзень роднай мовы быў заснаваны рашэннем 30-й сесіі Генеральнай канферэнцыі ЮНЕСКА ў лістападзе 1999 года і адзначаецца 21 лютага з 2000 года дзеля абароны моўнай і культурнай разнастайнасці.