Міністр эканомікі: Вялікі дадатак атрымалі па гародніне, малаку і яйках
21 лютага, Позірк. У студзені бягучага года ў эканоміцы пераважалі станоўчыя тэндэнцыі, у “зялёнай зоне” — сельская гаспадарка, заявіў 21 лютага міністр эканомікі Юрый Чабатар перад пачаткам пасяджэння прэзідыума Савета міністраў аб выніках сацыяльна-эканамічнага развіцця за 2023 год.
“Вялікі дадатак у першы месяц года атрымалі па гародніне, малаку і яйках”, — цытуе яго прэс-служба Мінэканомікі.
Чабатар нагадаў, што тэмп росту ВУП у студзені склаў 2,8% — “гэта плато ўжо квартальнага прагнозу”. Асноўным драйверам, паводле слоў міністра, стала прамысловасць (рост на 5,4%).
Кіраўнік ведамства адзначыў, што “павелічэнне рэальных даходаў насельніцтва дае магчымасць захоўваць высокія тэмпы ў рознічным гандлі — рост амаль на 10% да студзеня мінулага года”, у аптовым гандлі “высокія тэмпы росту (10,1%) стымулююцца актыўнасцю ў прамысловасці”, назіраецца аднаўленне у транспартнай сферы (1,3%).
“Але чакае напружаная работа па павелічэнню дынамікі”, — адзначыў міністр.
Паводле яго ацэнкі, у 2023 годзе “эканоміка спрацавала здавальняюча”.
Прэм’ер-міністр Раман Галоўчанка на пасяджэнні заявіў, што ў мінулым годзе “эканоміка, нягледзячы на ўсе выклікі і складанасці, спрацавала нядрэнна, паказала сваю ўстойлівасць нават у гэтых умовах” (цытата па відэафрагменце, распаўсюджаным прэс-службай урада).
Аб’ём валавога ўнутранага прадукта ў бягучых цэнах за студзень 2024 года склаў 18 млрд рублёў. У супастаўных цэнах да ўзроўню студзеня 2023 года ён вырас на 2,8%.
У 2023 годзе ВУП вырас на 3,9%, у 2022-м — знізіўся на 4,7%, у 2021 — эканоміка вырасла на 2,3%, у 2020 — скарацілася на 0,9%,
Згодна з найважнейшымі прагнознымі (дэ-факта планавымі) параметрамі развіцця краіны на 2024 год, прырост ВУП павінен скласці 3,8%.