Кіраўнік Татарстана ўзнагародзіў Лукашэнку ордэнам Дружбы
21 лютага, Позірк. “Можа быць, нават і добра, што знешнія абставіны нас (Беларусь і Расію. — “Позірк”.) штурхнулі бліжэй адзін да аднаго”, — заявіў Аляксандр Лукашэнка 21 лютага ў Казані на сустрэчы з кіраўніком Рэспублікі Татарстан Рустамам Мініханавым, якая ўваходзіць у склад РФ.
“Мы перасталі спрачацца на роўным месцы. Мы зразумелі, што сяброў у нас увогуле няшмат (а можа быць, сапраўдных і ўвогуле няма) і што нам трэба сваё шчасце ствараць самім”, — цытуе Лукашэнку ягоная прэс-служба.
Ён лічыць, што Татарстан — самы развіты, высокатэхналагічны рэгіён Расіі з сур’ёзным узроўнем прамысловасці. У той жа час канкурэнцыя на рынку “з-за абставін узрастае — заходнія кампаніі сышлі, а на іх месца прыходзяць кітайскія і іншыя вытворцы”. Але, нягледзячы на гэта, “Татарстан дэманструе ўпэўнены эканамічны рост”, дадаў Лукашэнка.
На яго думку, у Татарстане “ёсць з кім размаўляць, людзі разумеюць, кіравальнасць вельмі высокая, гаспадарскі падыход — ад зямлі”.
Мініханаў уручыў Лукашэнку мясцовы ордэн “Дуслык” (ордэн Дружбы).
У версіі прэс-службы Лукашэнкі ён удастоены ўзнагароды “за значны ўклад у развіццё супрацоўніцтва паміж Татарстанам і Беларуссю, умацаванне дружбы і ўзаемаразумення паміж народамі”.
Лукашэнка прыбыў у Казань для ўдзелу ў цырымоніі адкрыцця “Гульняў будучыні” — “міжнароднага мультыспартыўнага турніру ў канцэпцыі фіджытал”. Мерапрыемства наведваюць прэзідэнты Казахстана, Кыргызстана, Расіі, Таджыкістана, Узбекістана, а таксама прэзідэнт уваходнай у Боснію і Герцагавіну Рэспублікі Сербскай, які нядаўна пабываў у Мінску.
Гульні ў Казані пройдуць з 21 лютага па 3 сакавіка ў 20 дысцыплінах (гонкі дронаў, бітва робатаў, віртуальная велагонка і інш.).