22 лютага, Позірк. Разгледжаная ў парадку спецыяльнай вытворчасці крымінальная справа палітыкаў і актывістаў Алены Жываглод, Аляксандра Дабравольскага, Паўла Лібера і Паўла Марыніча перададзеная ў суд, паведамляе прэс-служба Генеральнай пракуратуры.
Ім прад’яўленыя абвінавачванні паводле ч. 2 арт.191 Крымінальнага кодэкса (перашкода працы Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў, камісій па рэферэндуме, здзейсненая з ужываннем пагрозы і іншым спосабам, групай асоб па папярэдняй змове).
Згодна з матэрыяламі справы, “абвінавачаныя сумесна з іншымі асобамі ў студзені-лютым 2022 года прынялі ўдзел у распрацоўцы і рэалізацыі адзінага плана супрацьпраўных дзеянняў для зрыву рэспубліканскага рэферэндуму па пытанні ўнясення змяненняў і дапаўненняў у Канстытуцыю Рэспублікі Беларусь”.
Указаны план прадугледжваў накіраванне па месцы працы і жыхарства членаў Цэнтрвыбаркама і камісій па рэферэндуме лістоў з распрацаваным абвінавачанымі тэкстам, сцвярджае ведамства.
У 11.000 адпраўленых лістах “утрымліваліся пагрозы для запалохвання, фарміравання сумневу ў правамернасці сваіх дзеянняў і пачуцця віны за працу ў складзе выбарчых камісій, выклікалі ўяўленні аб немагчымасці дзеючай улады забяспечыць іх бяспеку”.
У лістах таксама выказвалася патрабаванне даць прызнанай “экстрэмісцкім фарміраваннем ініцыятыве “Сумленныя людзі” нейкіх звестак”, “рабіліся неабгрунтаваныя заявы аб фальсіфікацыях яўкі на рэферэндум і вынікаў галасавання”.
“Усведамляючы ўласную безгрунтоўнасць, адсутнасць падтрымкі і аўтарытэту ў беларускім грамадстве, абвінавачаныя ініцыявалі накіраванне падобных лістоў ад імя Генеральнай пракуратуры, Следчага камітэта, іншых дзяржаўных органаў, а таксама службовых і іншых асоб, якія не мелі дачынення да такой супрацьпраўнай дзейнасці”, — гаворыцца ў паведамленні.
Спецыяльнае вытворчасць па справе было пачата 27 снежня.
Жываглод — кіраўніца ініцыятывы “Сумленныя людзі”, віцэ-спікер Каардынацыйнай рады па ўрэгуляванні палітычнага крызісу.
Дабравольскі з’яўляецца старэйшым палітычным дарадцам дэмакратычнага лідара Святланы Ціханоўскай, далучыўся да яе каманды ў 2020 годзе.
Лібер — стваральнік платформаў “Голас”, якая выкарыстоўвалася ў 2020 годзе для верыфікацыі вынікаў галасавання на прэзідэнцкіх выбарах, і “Новая Беларусь”.
Марыніч — кіраўнік праекта “Маланка медыя”, заснавальнік платформы Zubr, якая ў 2020 годзе таксама збірала інфармацыю пра выбары.
Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс. Магчыма па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, найміцтва, здрада дзяржаве, дыверсія, стварэнне экстрэмісцкага фарміравання альбо ўдзел у ім, масавыя беспарадкі, заклікі да санкцый і інш.