22 лютага, Позірк. “Спажывецкі рынак у 2023 годзе характарызаваўся стабільнасцю, пра што сведчаць не толькі лічбы, але і паліцы ў крамах: асартымент быў найшырэйшы, сістэма рэгулявання цэн, якая была ўкаранёная ў гандаль у 2022 годзе і ўзмацнілася ў 2023 годзе, не дала вымыцца таварам з нашых крам”, — заявіла 22 лютага на прэс-канферэнцыі “Цэнавая палітыка ў Беларусі: правілы і рэгуляванне” намесніца старшыні Нацыянальнага статыстычнага камітэта (Белстат) Наталля Тарасюк.
“Інфляцыя ў 2,5 разы ніжэйшая, чым грашовыя даходы насельніцтва, вельмі паказальная лічба, якая кажа пра тое, што і жыхары нашай краіны, і госці, якія да нас прыязджаюць, могуць больш купіць тавараў на ўнутраным рынку. Рэальна наяўныя грашовыя даходы, якія ідуць за мінусам падаткаў і з улікам інфляцыі, таксама значна ніжэйшыя, чым узровень інфляцыі, гэта значыць 6,3% пры 5, 8%“, — адзначыла Тарасюк.
Намеснік старшыні Белстата прызнала, што ў мінулым годзе “быў рост цэн на некаторыя тавары ў крамах”, але гэта, паводле яе слоў, “увогуле досыць аб’ектыўная эканамічная сітуацыя”.
“У нас падаражэў алей аліўкавы, які з’яўляецца стопрацэнтным імпартам, свежамарожаная рыба, у нас падаражэлі цытрусавыя, іншыя віды садавіны, запчасткі да аўтамабіляў, рыс”, — адзначыла яна, дадаўшы, што былі і тавары, па якіх “адбылося досыць істотнае зніжэнне кошту”.
“Пачатак гэтага года характарызуецца таксама такімі з’явамі, вынікі якіх можна ахарактарызаваць як эфектыўныя, паколькі ўзровень інфляцыі за студзень меншы за запланаваныя значэнні. Пазітыўным таксама з’яўляецца тое, што на спажывецкім рынку па вельмі многіх таварных пазіцыях адбыўся рост долі айчынных тавараў. Тыя працэсы, якія склаліся з улікам увядзення сістэмы цэнаўтварэння, падштурхнулі народ наш, наша насельніцтва купляць больш беларускіх тавараў”, — заявіла прадстаўніца ведамства.
Гаворачы аб зборы статыстычных даных па індэксе спажывецкіх цэн, Тарасюк адзначыла, што “шляхам прыцягненне рэгістратараў збіраем больш за 70 тыс. каціровак у 31 горадзе нашай краіны, абследуем 8,5 тыс. аб’ектаў рознай накіраванасці — гэта і буйныя сеткі, малы і сярэдні бізнес, рынкі, індывідуальныя прадпрымальнікі і гэтак далей”.
У 2024 годзе Белстат укараніў у практыку некалькі навінак, “якія палягчаюць нам працу і робяць якасць сабранай інфармацыі яшчэ больш дакладнай”. “Мы выкарыстоўваем дадзеныя АІС СККА — інфармацыю, сабраную з дапамогай касавых падсумоўваючых апаратаў. Мы ўжо працуем з гэтай сістэмай па пяці буйнейшых аб’ектах Мінска і аналіз той сітуацыі на спажывецкім рынку і тых лічбаў, якія мы атрымліваем з дапамогай збору рэгістратарамі і па касавых падсумоўваючых апаратах, гавораць аб дакладнасці работы нашых супрацоўнікаў”, — адзначыла прадстаўніца Белстата.
Гл. таксама:
Белстат: Цэны ў студзені выраслі на 0,8%
Рост унутранага попыту фарміруе перадумовы для пагаршэння сальда знешняга гандлю — ЕАБР