Ціханоўская заклікала не надаваць “прызначанаму парламенту” сяброўства ў ПА АБСЕ
22 лютага, Позірк. Не прызнаваць вынікі парламенцкіх выбараў 25 лютага і не надаваць членам “зноў прызначанага парламента Беларусі” месца ў Парламенцкай асамблеі Арганізацыі па бяспецы і супрацоўніцтве ў Еўропе (ПА АБСЕ) заклікала Святлана Ціханоўская АБСЕ і яго асобныя дзяржавы-члены. 22 лютага дэмакратычны лідар выступіла ў Вене перад групай сяброў дэмакратычнай Беларусі ў Пастаянным савеце АБСЕ, паведаміў “Позірку” галоўны дарадца палітыка Франак Вячорка.
Ціханоўская адзначыла, што ініцыятыва стварэння групы “пасылае выразны сігнал аб тым, што дзяржавы — ўдзельніцы АБСЕ хочуць сябраваць з дэмакратычнай, сумленнай, надзейнай Беларуссю, не з рэжымам, які катуе і забівае палітычных зняволеных, і не з рэжымам, які дапамагае Расіі ў яе агрэсіўнай вайне супраць Украіны”.
Праінфармаваўшы прысутных аб нядаўняй смерці ў месцах пазбаўлення волі пятага беларускага палітвязня Ігара Ледніка, дэмлідар звярнулася да ўрадаў краін АБСЕ з заклікам падняць пытанне аб неадкладным вызваленні палітвязняў, вынесці гэтае пытанне на ўзровень ААН. “Вашы дыпламаты ў Мінску могуць запатрабаваць доступу ў турмы, асабліва тым, хто ўтрымліваецца без сувязі са знешнім светам, як мой муж”, — прапанавала Ціханоўская. На яе думку, “прыйшоў час прад’явіць Лукашэнку ўльтыматум: разбуральныя санкцыі супраць рэжыму, калі вы не спыніце забіваць людзей”. “Такія рэжымы разумеюць толькі мову сілы, і мы павінны праявіць рашучасць і адвагу”, — падкрэсліла яна.