Лукашэнка звязаў 23 лютага з барацьбой беларусаў за суверэнітэт і незалежнасць
23 лютага, Позірк. Аляксандр Лукашэнка, віншуючы “воінаў і ветэранаў” Узброеных сіл з Днём абаронцаў Айчыны, які афіцыйна адзначаецца 23 лютага, звязаў яго з “барацьбой беларусаў за суверэнітэт і незалежнасць, за права жыць свабодна на роднай зямлі”, паведамляе яго прэс-служба.
Паводле яго слоў, беларуская армія сёння валодае “ўсім неабходным, каб даць адпор любому агрэсару, адстаяць мір і згоду на беларускай зямлі, а створаная ў краіне сістэма тэрытарыяльнай абароны і народнага апалчэння надае справе абароны Айчыны сапраўды ўсенародны характар”.
Сярод гісторыкаў няма адзінага меркавання, чаму менавіта 23 лютага адзначаўся ў СССР у розны час як Дзень Чырвонай арміі, Дзень Савецкай арміі, Дзень Савецкай арміі і Ваенна-марскога флоту. Пастановай Прэзідыума УЦВК ад 18 студзеня 1923 года дзень 23 лютага 1918 года быў названы днём апублікавання Дэкрэта аб стварэнні Чырвонай арміі. У другой палове 1930-х гадоў у СССР падзеі лютага 1918 года сталі трактавацца як перамога, здабытая ў гэтыя дні над немцамі пад Псковам і Нарвай.
22 лютага 2018 года, выступаючы на “ўрачыстым сходзе, прысвечаным 100-годдзю Узброеных сіл Беларусі”, Лукашэнка заявіў, што “той няпросты гістарычны перыяд пакінуў нам велізарную колькасць трактовак і інтэрпрэтацый, аднак мы павінны памятаць галоўнае: менавіта тыя людзі і тая Чырвоная армія дапамаглі нам выжыць і адбыцца як нацыі”.
21 лютага 1918 года выканкам Рады Усебеларускага з’езда выдаў Устаўную грамату да народаў Беларусі, у якой абвясціў сябе часовай уладай у рэспубліцы. Крыху больш чым праз месяц, 25 сакавіка, Рада Беларускай Народнай Рэспублікі прыняла 3-ю Устаўную грамату, у якой абвяшчалася яе незалежнасць.